CEBU, Philippines – Manubag kadtong responsabli sa paglapa sa usa ka pawikan sa lungsod sa Pinamungajan sa higayun nga sila mahibaw-an sa mga awtoridad.
Matud ni Eddie Llamedo, tigpamaba sa Department of Environment and Natural Resources-7, nga kalapasan sa Akta Republika 9147 kon Wildlife Resources Protection Act of 2001 ang ipasaka batok sa mga responsabli.
Kini may silot nga pagkapriso sulod sa unom ka tuig ngadto sa 12 ka tuig ug pabayron og multa nga P100,000 ngadto sa P1 milyon.
Ang City Environment and Natural Resources Office (CENRO) sa dakbayan sa Toledo ang gimanduan sa DENR-7 sa pagpahigayun og imbestigasyon sa insidente.
Matud ni Llamedo nga ang publiko gipahibawo na nga sakop sa Tañon Strait Protected Seascape ang lungsod sa Pinamungajan diin daghan ang makitang pawikan sa lugar.
Ang DENR-7 nanawagan sa mga lokal nga kagamhanan ug mga kapitan sa barangay nga motabang sa pagprotekta sa mga pawikan ug uban pa’ng endangered species.
Gibana-bana’ng 100 ka kilos ang gibug-aton sa pawikan nga gilapa sa niaging adlaw diin giputlan pa sa ulo sa lungsod sa Pinamungajan. – /GMR) (BANAT NEWS)