CEBU, Philippines - Duha ang patay ug 23 ang angol sa managlahing disgrasya sa kadalanan sa lalawigan sa Sugbo sa miaging adlaw.
Patay ang usa ka pasahero sa tricycle samtang angol ang upat ka kauban niining pasahero ug ang drayber human nga gibanggaan sila sa usa ka Isuzu Crosswind sa barangay Lindogon sa lungsod sa Sibonga.
Ang namatay naila nga si Cindy Lucero, 45, taga Punta Princesa, Cebu City, samtang angol sila si Irish Tariman,17; Tersa Monterde, taga Alang-alang, Mandaue City; Imelda Dacumos, 35 ug Lorna Pelonio, 60, taga El Pardo, Boljoon ug ang drayber sa tricycle nga si Alfonso Sarausad, 58, taga Guiwanon, Argao.
Base sa imbestigasyon, si Memze Embate, 35, taga Gun-ob, Lapu-Lapu City nga nag-drive sa Crosswind misulay og overtake sa tricycle apan nadumbolan niya kini.
Tungod niini, nawad-an og kontrol si Sarausad hinungdan nga natagak kini sa bakilid ug maayong pagkaangol sa mga pasahero ug sa drayber.
Gidala ang mga biktima sa Argao District Hospital apan nagrabihan si Lucero hinungdan nga gidala kini sa Vicente Sotto Memorial Medical Center apan nakabsan kini sa iyang kinabuhi. (BANAT NEWS)