CEBU, Philippines - Dili malakip sa naandan nga rota sa Suroy-Suroy Sugbo sunod buwan ang ubang tourist destination sa amihanang bahin sa probinsiya.
Apan dunay mga lugar nga sa unang higayun bisitahon sa grupo sama sa Aginid Falls sa Samboan ug Mainit Spring sa Malabuyoc, suma pa ni Provincial Tourism Officer Mary Grace Paulino.
Gipasabot ni Paulino nga ang tumong nila mao nga matag tuig lain-laing tourist spots ang bisitahon.
Dili malakip nga suruyon sunod buwan ang Kawasan Falls sa lungsod sa Badian human usab kini naguba sa bagyong Quennie.
Sunod buwan 12 ka lungsod ang agian sa Suroy-suroy Sugbo diin ang Oslob ug Alegria nalakip gihapon. Matud ni Paulino nga sunod tuig eco-tourism ang i-sentro sa Suroy-Suroy Sugbo.
Subay niini, si Bise Gob. Agnes Magpale miawhag sa mga lokal nga kagamhanan sa pagpalambo sa ilang eco-tourism sites.
Matud ni Magpale nga buot nilang madiskubre ang mga water falls sa ubang kalungsuran aron mabutangan og karsada ang lugar nga masulod o masuruyan sa mga bisita. (Brenda D. Batuto/GMR)
Rep. Quisumbing magminyo na
Gipahibawo ni Kongresista Gabriel Luis “Luigi” Quisumbing ang gikatakda na niyang pagsulod sa kaminyoon sa Mayo 7 sunod tuig uban sa magpapatigayon niya’ng hinigugma nga si Maricar Hofileña.
Matud sa 35-anyos nga kongresista sa ika-unom nga distrito sa probinsiya sa Sugbo nga nagpadayun na karon ang ilang pagpadala og imbetasyon sa ilang mga higala alang sa pagtambong sa umaabot nilang kasal.
Tinun-an pa lang sila sa edad nga 14-anyos nga nagka-ibganay na ang duha.Si Hofileña, 35-anyos usab, nga taga Silay, Negros Occidental nga nagbase na karon sa Manila ug sakop sa banay ni Carmel Luzurriaga Durano nga asawa ni Danao City Vice Mayor Ramon “Red” Durano VI.
Giangkon ni Quisumbing nga wala na sila nagkita sulod sa 20 ka tuig tungod kay didto man siya magtungha sa Amerika niadtong higayuna.
Nagkatagbo sila og balik dihang nitambong si Hofileña sa haya sa namatay niyang ig-agaw kinsa suod usab nga higala ni Quisumbing hangtud nga nagkasuod og balik ug nagkasinabtanay sa usa’g-usa.
Gipaila ni Quisumbing ang mga principal sponsors sa ilang kasal nga naglakip nilang Mandaue City Mayor Jonas Cortes, Consolacion Mayor Teresa Alegado, Cordova Mayor Adelino Sitoy, Senate President Franklin Drilon, Budget Secretary Florencio Abad, House Speaker Feliciano Belmonte Jr., Senador Grace Poe ug Cabinet Secretary Rene Almendras. (BANAT NEWS)