CEBU, Philippines - Nakadawat og hulga sa kinabuhi ang regional director sa Department of Education (DepEd-7), Dr. Carmelita Dulangon, pinaagi sa text messages.
Sa niaging semana pa nadawat ni Dulangon ang hulga apan niining bag-o lang siya nidangop sa kapolisan gumikan sa kahadlok ug kabalaka ilabi na nga moretiro na siya sa katungdanan sunod semana.
Giingong gikwestiyon sa nanghulga ang pagdumala ni Dulangon sa DepEd-7.
May gidudahan na si Dulangon nga usa sab ka opisyal sa DepEd-7 kinsa wala makauyon sa iyang mga desisyon.
Bisan pa sa hulga, mapasigarbuhon gihapon si Dulangon sa iyang 45 ka tuig nga pagserbisyo sa DepEd. Gani iyang gipahinumduman ang mga magtutudlo nga dili mogasto og dagku sa ilang Christmas party karong tuiga.
Gipaningkamutan sa ahensiya nga madawat na sa mga magtutudlo ang ilang Performance Base Bonus (PBB), Productivity Enhancement Incentives (PEI) ug lakip na ang ilang madawat sa Local School Board.
Kini aron ikapaambit sa ilang mga tinun-an ang grasya nga ilang madawat, sumala pa ni Dulangon.
Alang kang Dulangon nga ang kamahinungdanon sa Pasko ang labing importante aron masabtan sa mga bata kun unsa gyud ang kahulugan sa Pasko. (BANAT NEWS)