CEBU, Philippines - Girekomendar sa Ombudsman ang pagpasaka og kaso batok ni kanhi mayor Celestino Martinez III sa dihang usa pa kini ka munisipyo lakip na ang upat ka mga opisyal sa siyudad tungod sa kasong pangawkaw.
Si Martinez ug mga opisyal sa Bogo nga sila si municipal accountant nga si Crescencio Verdida, municipal treasurer nga si Rhett Minguez, budget officer nga si Mary Lou Ursal, assistant municipal treasurer, Julio Ursonal, Jr., nakita sa Ombudsman nga nakalapas sa Republic Act 3019, Section 3(e).
Dugang kalapasan sa Section 3(g) sa RA 3019 usab ang nakita nga nabuhat nila ni Martinez III ug Ursunal Jr. Sa orihinal nga reklamo ni Antonio Balunan, nalakip sa iyang gikasohan si Bise Mayor Vicente Rodriguez ingon man ang presidente ug chairman sa Board sa Bogo Municipal Employees Multi-Purpose Cooperative (BMEMPC) nga sila si Santiago Oliamot, ug mga sakop nga sila si Santiago Sevilla, Lyndon Hee Acusar, Wilfredo Manubag, Victor Elliot Lepiten III, Teodoro Pedroza, Ernesto Faciol ug Leo Villacrusis. Apan ang maong mga opisyal wa makitai og kasaypanan sa Ombudsman hinungdan nga gibasura ilang mga kaso.
Ang maong reklamo may kalambigitan kini sa Ginintuang Agrikultura Makasama (GAM) program sa region-7 nga mikabat og P20 milyones nga pundo sa Department of Agriculture-7.
Ang maong pundo gikatahong gipasa ngadto sa BMEMPC ug giingong gipautang bisan wala’y klarong eksperiyensya sa livelihood projects nga gigamitan niini ug wala masubay sa katuyoan sa GAM nga matabangan ang mga mag-uuma ug marginalized sector. Gawas pa niini, girekomendar usab sa Ombudsman ang paghimo og imbestigasyon kalabot sa laing alegasyon batok sa mga gipangreklamo tungod sa giingong paghatag og P500,000 financial assistance sa Bogo ngadto sa BMEMPC.
Ang maong financial assistance gikatahong gikan sa 20 porsiyentong Development Fund sa maong lungsod. Si Assistant Ombudsman Jennifer Jardin-Manalili maoy mipahigayon og review sa reklamo ug giaprubahan kini ni Ombudsman Conchita Carpio Morales niadtong Nobiyembre 21, 2014. (BANAT NEWS)