CEBU, Philippines - Usa ka babaye ang gisikop human masakpi sa polis nga nangawat og mga tambal sulod sa personnel's quarter sa PNP Hospital diha sa Camp Sotero Cabahug, Gorordo Avenue kaniadtong Biyernes sa hapon.
Ang giingong nangawat mao si Joan Mantos, 40 anyos, minyo apan walay trabaho, ug taga Sitio Kalumpang, Barangay Kawayan, Moalboal samtang ang polis nga nakasikop kaniya mao si SPO1 Eulogio Cubillin Jr.
Nakumpiskar gikan sa suspek ang usa ka kahon sa Vhellox 500 (Amoxicillin Trihydrate) nga adunay sulod 100 ka kapsula nga mukabat sa P500 ug usa ka kahon sa Kassenox Forte (Contrimoxazole) nga adunay sulod 77 ka kapsula nga mukabat ‘sab og P500 gihapon. Apil nga nakuha gikan sa suspek ang usa ka itom nga patrol shoes nga nagkantidad og 1,500 pesos.
Kasamtangang gibalhog sa prisohan ang maong suspek kinsa pasakaan og kasong pagpangawat. (BANAT NEWS)