CEBU, Philippines - Ipatuman sa Department of Education (DepEd) Toledo City Division ang make-up classes sa mga elementarya ug sekondarya nga tunghaan sa dakbayan.
Matud ni Dr. Ronald Gutay nga kinahanglan nga adunay mga adlaw nga idugang sa pagklase isip tapak sa mga adlaw nga gikanselar ang klase gumikan sa bagyong Ruby.
Dugang ni Gutay nga kini alang usab sa pagsunod sa kamandoan sa DepEd.
Gikinahanglan nga adunay 201 ka adlaw nga mapahigayon nga klase sa academic school year 2014-2015. Sa pagkakaron sabutan pa kun kanus-a ipatuman ang dugang mga adlaw sa klase.
Gidugang sa opisyal nga posible sa buwan sa Enero ug Pebrero ipatuman ang make-up classes nga molanat sa tulo ngadto sa upat ka adlaw.
Gikatakda sa Marso 27, 2015 ang katapusang adlaw sa school year 2014-2015. (Raymond Abarcas/GMR)(BANAT NEWS)