CEBU, Philippines - Napalgan sa mga tawo ang usa ka puya nga gisulod og usa ka karton diha sa Talisay Fish Port sa dakbayan sa Talisay. Base sa imbestigasyon sa kapolisan nga ang Talisay City Police Station nakadawat og tawag gikan sa usa ka concerned citizen nagpahibalo nga dunay puya nga nakit-an sa Barangay Tangke.
Daling mirespondi sila si Police Officer 3 Oliver Ortega, PO3 Ferdinand Pablo ug PO2 Jude Enemicio aron sa pagsusi sa maong taho.
Nasuta sa mga polis gikan sa security guard sa Talisay City Fish Port nga si Marvin Cabatana nga duna siyay nabantayan pasado alas 4:00 sa miaging hapon nga usa ka karton nga daw gibiyaan duol sa iyang pwesto.
Nakuryoso ang maong security guard kung unsay sulod sa karton hinungdan nga iya kining gihiling. Ang sulod diay niini usa ka patay nga puya nga gibana-bana nga duha hangtod sa tulo pa ka buwan.
Gidala sa mga polis ang maong karton sa Cansojong Cemetery ug didto gilubong. Wa pa matino kung kinsa ang naglabay sa maong puya ug padayon pa ang imbestigasyon sa pagsusi kun kinsa ang inahan sa maong bata. (BANAT NEWS)