CEBU, Philippines - Katorse ka barangay sa lungsod sa Jagna, Bohol ang giingong naigo sa storm surge tungod sa tropical depression Queenie nga mitadlas sa Central Visayas sugod pa niadtong milabay’ng gabii.
Naapektuhan sa storm surge ang coastal barangays matud pa ni Engr. Jery Araneta, Municipal Risk Reduction Officer sa maong lungsod.
Matud pa ni Araneta, gumikan sa kadaot nga ilang naangkon gipaubos sa state of calamity ang tibuok lungsod sa Jagna pinaagi sa Resolution 15-11, 2014.
Base sa ulahing talaan dunay duha nga missing ug usa niini gikan sa Jagna ug usa usab gikan sa Ubay ug padayon ang search and rescue operation.
Nasayran nga usa sa mga na-missing giila nga si Robinson Sevillas diin kuyog niini ang iyang duha ka kauban sakay sa usa pumpboat gikan sa Camiguin ug padulong maghatud og lansones.
Apan pag-abot sa kadagatan sa Bunga Mar sa Jagna mitikyaob ilang pumpboat tungod sa dagkong bawod.
Narekover usab ang patay’ng lawas ni Ceasario De La Serna, Chief Engineer sa MV Edward Lawrence nga gituohang natagak sa barko kagahapon sa kaadlawon diha sa Barangay Looc, Jagna.
Sa pagkutlo ning balita, 29 ka panimalay ang hingpit nga nangaguba, 264 ang partially damaged samtang 78 ka pumpboats ang nangagusbat. Dul-an usab sa tunga sa milyon ka pesos ang danyos sa mga pananom ug kapin sa 300 na ka relief packs ang naapud-apod. (BANAT NEWS)