CEBU, Philippines - Gipaluyohan sa konseho sa dakbayan sa Mandaue ang balaudnon tumong sa pagngan sa unang taytayan sa Mandaue ug Mactan og Senator Sergio “Serging” Osmeña Bridge.
Ang House Bill No. 2406 gipangamahanan sa mga kongresista sa Sugbo nga sila si Kong. Benhur Salimbangon, Kong. Raul del Mar, Kong. Rodrigo Abellanosa, Kong. Gerald Anthony Gullas, Kong. Wilfredo Caminero, Kong. Gwendolyn Garcia, Kong. Ace Durano, Kong. Gabriel Luis Quisumbing ug Kong-Aileen Radaza.
Usa ka resolusyon ang gipasar sa konseho sa dakbayan sa Mandaue ug giaprobahan ni Mayor Jonas Cortes.
Kopya sa resolusyon ang gipadangat na ngadto sa Kongreso niadtong Oktubre 30.
Ang maong taytaytan gipatukod ni kanhi Presidenti Ferdinand Marcos sa mga tuig 1970’s ubos sa plano ni anhing Senador Osmeña.
Ang pagdala sa pangan ni Osmeña sa maong taytayan gihimo isip pagpasidungog niini. (BANAT NEWS)