CEBU, Philippines - Tulo ka mga lalaki ang nasikop sa mga sakop sa Criminal Investigation Detection and Management Group (CIDG-7) atol sa pagpangronda sa usa ka balay nga giabangan sa target sa mga operatiba sa Barangay Canduman dakbayan sa Mandaue.
Ang mga nasikop naila nga sila si Emeliano Roa, 44, Harry Llurin, 40, ug Bernie Sungcol, 30. Samtang usa ‘sab ka babaye ang giimbetar sa mga operatiba nga didto sa balay atol sa pag ronda sa mga awtoridad.
Matud pa ni Superintendent Fermin Armendarez, ang deputy chief sa CIDG-7 nga target sa ilang operasyon mao si Roa pinasikad sa search warrant nga giisyu ni RTC Judge Soliver Peras sa Branch 10 sa kasong paghupot og ilegal nga armas.
Atol sa paghamag sa mga operatiba ilang naaktohan nga nigamit og ilegal nga drugas sila si Llurin ug Sungcol, samtang didto ‘sab sa ikaduhang andana si Roa.
Nakuha sa kapulisan gikan sa balay ni Roa ang ubay-ubay nga drugas nga mikantidad og P35,000, mga drug paraphernalia ug usa ka .45 caliber pistol nga duna’y mga bala. Sumala pa ni Armendarez nga taud-taod sab nila nga gipaubos sa surveillance si Roa hangtod nga kini nahibaw-an nga didto nag-abang sa maong lugar.Usa sa gisubay karon sa CIDG-7 kung apil ba sa carnaping si Roa human sa nakuha sab nila nga impormasyon. Sa pakighinabi sa mga tigbalita, si Roa mihimakak sa mga pasangil. (BANAT NEWS)