CEBU, Philippines – Pipila ka adlaw human namatay ang duha ka polis sa lungsod sa Moalboal atol sa anti-drug operation sa Barangay Tomonoy, giangkon sa kapolisan nga naglisod sila sa kaso tungod kay way mga testigos nga makatumbok sa mga gunman.
Sila si Police Officer 3 Fabio Fernandez ug Police Officer 1 Alrasid Jimlani gipamusil patay sa wala pa mailhing lalaki o mga lalaki atol sa pagpangronda nila sa panimalay sa usa ka drug suspect nga si Michael Aquino.
Matud pa ni Chief Superintendent Prudencio Tom Bañas, ang hepe sa Police Regional Office-7 nga bisan usa ka testigos wala’y miduol kanila aron motabang sa kasulbaran sa kaso.
“Sa totoo lang medyo malayo pa tayo,” pag-angkon pa ni Bañas. Usa sa ilang giproblemahan mao ang kompirmasyon sa diskripsyon sa mga mipatay sa mga polis. Samtang si Superintendent Rodolfo Albotra, ang hepe sa Provincial Intelligence Branch (PIB) sa iyang bahin miingon nga duna silay lead apan buot nilang klaruhon ang imbestigasyon ilabi na nga ang mga biktima ilaha rang mga kauban ug di sila gusto nga inosenteng tawo ang mapagan.
Apan si Albotra mikompIrmar nga ania pa sa Sugbo ang mga responsiAble ug wala pa nakapalayo.
Gitug-an ‘sab ni Bañas nga nakadawat na sila og report gikan NI Senior Superintendent Noel Gillamac ang hepe sa Cebu Provincial Police Office, apan wala pa niini nadawat ang kopya sa ballistics report. Sumala pa ni Bañas nga gikan sa ballistics report ila unya nga subayon kung ang bala nga nakapatay ni Jimlani gikan ba sa armas ni Fernandez o gikan sa lain nga armas.
“If they have recovered slugs sa namatay na polis, maari tayong makakuha ng forensic data as to the origin of the bullet if it came from his own gun or na-agaw ang armas niya,” dugang pasabot ni Bañas.
Dunay nanggawas nga report nga posibleng nailogan sa iyang armas si Fernandez ug maoy gigamit pagpusil kanila sa gunman. – /EIM) (BANAT NEWS)