CEBU, Philippines – Patay ang usa ka negosyante nga babaye dihang gidunggab sa iyang katabang nga lalaki sa iyang tindahan sa Barangay Poblacion, Dakbayan sa Danao human sa Pacquiao- Algieri fight niadtong Domingo sa hapon.
Ang biktima mao si Gemma Roble, 40, taga Barangay Tuburan Sur, Dakbayan sa Danao samtang ang suspetsado mao si Celso Hermoso, 23, taga Sitio Ylaya, Barangay Poblacion sa mao gihapong dakbayan.
Sumala pa ni Senior Police Officer 1 Ildefonso Prosia sa Danao Police Station ang biktima nakig-estorya pa sa iyang anak nga babaye nga si Gina Lyn Roble, 27, dihang miabot ang suspetsado.
Matud pa ni Pantaleon nga gikan pa nagtan-aw og boxing sa telebisyon sa Pacquiao-Algieri fight ang suspetsado ug diretsong mikuha og butcher knife dayong lipot sa luyo sa biktima ug gihansakan kini makausa diha sa bukobuko.
Tungod sa kakusog ug kahait sa kutsilyo milapos kini sa ilokan nga bahin sa lawas sa biktima. Ang anak sa ginang nga nakalitan sa hitabo wala dayon makalihok.
Ang mga kaubang manindahay mao nay daling mitabang sa ginang ug gidala kini sa Danao District Hospital apan gideklarar kini sa mga doktor sa maong tambalanan nga dead on arrival.
Si Pantaleon miingon nga wala na nila maabti pa ang suspek nga daling misibat palayo sa maong dapit. Gisubay pa sa kapolisan kun unsay motibo sa suspek nganong nabuhat niya kini sa agalon. – /EIM) (BANAT NEWS)