CEBU, Philippines - Sugdan na sa sunod tuig ang pagpausbaw sa buhis sa siyudad sa Mandaue subay sa naaprubahang ordinansa nga bag-ong Revenue Code sa dakbayan. Si Mandaue City Treasurer Atty. Regal Oliva namahayag nga anha mabantayan ang tax increase sama sa business tax ug real property tax atol na sa pag-renew sa mga business permits sa mga negosyante.
Ang maong usbaw sa buhis natigayon human sa public hearing nga gitambongan sa nagkadaiyang sektor lakip ang mga magpapatigayon sa dakbayan ug matud pa walay nisupak niini.
Ang siyudad mopatuman og 100 percent nga usbaw sa buluhisan apan katulohon kini pagkolekta aron di mabug-atan ang magbubuhis.
Sa unang tulo ka bulan, 30 porsiyento lang nga usbaw sa buhis ang kolektahon ug sa bulan sa Abril himuon nang 60 porsiyento sa balanse ug sa pagtapos sa tuig 2015 pabayran na ang balanse o 100 percent sa buluhisan.
Matud pang Oliva gibase ang usbaw sa makaya sa mga taga Mandaue City, apan mas ubos pa kini itandi sa ubang dakbayan sama sa Carcar City, Bogo City ug Talisay City. (Romeo T. Limpangog/EIM)(BANAT NEWS)