CEBU, Philippines - Gihulagway ni Bise Gob. Agnes Magpale nga dunay pamolitika ang pagbisita ni Bise Presidente Jejomar Binay sa Sugbo.
Matud ni Magpale nga ang pagbisita ni Binay sa Sugbo wala’y kalabutan sa pagtabang sa mga biktima sa bagyong Yolanda.
"Naa koy nadawat nga report nga naa daw mga tarpaulins, apan ni-claim sila nga wala man daw sila nangampanya bisa’g klaro na kaayo," asoy ni Magpale.
Mas gipili ni Binay ang pagbisita sa nagkadaiyang bahin sa Sugbo kaysa pagtambong sa hearing sa Senado kabahin sa mga kontrobersiya nga iyang giatubang. Nipadayag hinuon si Magpale sa kabalaka sa wala pag-atubang ni Binay sa mga isyu.
Giklaro usab niya nga ang mando ni Presidente Benigno “Noynoy” Aquino III kanila nga mga sakop sa Liberal Party (LP) nga unahon ang trabaho. (BANAT NEWS)