CEBU, Philippines – Gilubong na kagahapon ang patay’ng lawas sa kanhi mayor sa dakbayan sa Mandaue, Alfredo “Ingko Pedong” Ouano, sa menteryo sa barangay Guizo.
Gikan sa ilang residensiya sa barangay Opao sa maong dakbayan, gidala ang iyang haya sa National Shrine of Saint Joseph diin nagtapok ang liboan ka Mandauehanon nga mitambong sa misa nga gipahigayon.
Sa gihimo nga necrological service sa katapusang pagbilar sa iyang haya niadtong Domingo sa gabii, gibatbat sa iyang mga higala ug mga kauban sa pagserbisyo sa kagamhanan ang talagsaong hiyas sa iyang pagkatawo.
Naglakip niini sila si Atty. Paterno “Pat” Acabodillo, retiradong Register of Deeds sa dakbayan, kanhi barangay kapitan Amado Manatad sa Labogon, Konsehal Diosdado Suico.
Nihatag usab sa ilang pamahayag sila si Mayor Jonas Cortes, Konsehal Bethoveen “Toben” Andaya, Jose Ng, negosyante; ug uban pa.
Ang konseho nga gipangulohan ni Bise Mayor Glenn Bercede nipalabang og resolusyon nga naghatag og pasidungog sa namatay ug ilang gitunol ngadto sa asawa nga si Manding Loling ug mga anak. – /GMR) (BANAT NEWS)