CEBU, Philippines - Tulo ka gidudahang drug pushers ang nadakpan sa buy-bust operation diha sa Zone Okra, Barangay Paknaan, Dakbayan sa Mandaue .
Si Senior Inspector Genilo Veraque, hepe sa Presinto 3 sa Mandaue City Police Office (MCPO) nga maoy nangulo sa buy- bust operation miila sa tulo nga sila si Aldrin Sumosot, 41, Reynante Rosales, 39 ug usa ka babaye nga usa ka Jennifer Saga, 26.
Matud pa ni Police Officer 3 Arvin Palompon sa Presinto 3 nga nahinabi sa Banat News nga si Sumosot maoy ilang target sa buy-bust operation.
Nakuhaan kini og tulo ka paketeng shabu ug ang buy-bust money.
Samtang si Rosales nakuhaan og usa ka kalibre .38 nga may mga bala ug drug paraphernalia usab ang nakuha gikan kang Saga.
Gitug-an ni PO3 Palompon nga nakadawat na sila og mga taho gikan sa nagpakabana nga mga lumolupyo sa maong dapit labot sa ilegal nga kalihokan ni Sumosot.
Ang tulo kasohan og paglapas sa Republic 9165 o Comprehensive Dangerous Drug Act of 2002 ug illegal possession of firearm batok ni Rosales. (BANAT NEWS)