CEBU, Philippines – Gihagit ni Cebu City Mayor Michael Rama og all-out-war ang Department of Public Works and Highways ug ang PLD Construction.
Kini human wala siya nahimuot sa kahimtang sa giugmad nga dalan atubangan sa sam-ang sa Calamba kagahapon sa buntag sa iyang pagsuroy.
Matud ni Rama nga nasagmuyo kaayo siya sa iyang nakita nga wala matarung og limpyo ang mga yuta nga kinawot sa paghimo sa karsada.
Gawas pa, matud ni Rama nga misiwil lang gihapon ang mga kabilya sa kilid sa karsada ug nakita niya nga peligro kaayo sa katawhan.
Nakita usab ni Rama nga nagpasad lang ang mga debris sa maong lugar ug wala’y “safety and security concern” ang contractor. Tungod sa iyang kasagmuyo, tulo ka oras ang nagahin ni Rama aron nga ma-supervise niya ang pagpanglimpyo sa dalan.
Nunot niini mohimo si Rama og mga lakang batok sa contractor tungod sa ilang gibuhat atubangan sa Calamba cemetery. (BANAT NEWS)