CEBU, Philippines - Negatibo sa fingerprint testing ang walo ka kawani sa City Treasurer's Office sa Toledo nga gidudahang nilungkab sa maong buhatan sa niaging buwan. Kini ang gibutyag ni Supt. Ricky Delilis, hepe sa Toledo City Police Station.
Una na’ng gipailawom sa lie detector examination ang maong mga kawani diin negatibo gihapon ang resulta.
Dugang ni Delilis nga gawas sa walo, aduna pa’y laing usa ka kawani ang ilang gipanid-an.
Giklaro usab sa hepe nga mokabat sa P400 mil ang nadagit nga kwarta sa kawatan sukwahi sa unang nigawas nga kapin sa P1 milyon ug may taho pa nga P6 milyones ang nahanaw.
Nagkanayun si Delilis nga dili mohunong ang kapolisan sa pagpangita og paagi pagsulbad sa maong kaso. (BANAT NEWS)