CEBU, Philippines – Naugdaw ang usa ka school building nga may tulo ka lawak-saringan sa Daanlungsod Elementary School sa Barangay Daanlungsod sa lungsod sa Medellin kagahapon sa hapon.
Si Senior Police Officer 1 Jovito Aballe, desk officer sa Medellin Police Station nga nahinabi sa Banat News miingon nga base sa imbestigasyon sa Medellin Fire Station pinangulohan ni Fire Officer 2 Alex Larrobis, nagsugod ang sunog ala-una sa hapon.
Daling mitubag sa alarma ang kabomberohan apan bisan pa man sa ilang pagpasirit og tubig naugdaw g’yud ang tulo ka classrooms sa maong tulunghaan nga giokupar sa Kinder, Grade 4 ug Grade 6.
Matud pa ni Aballe nga mga karaan nga “Marcos-type nga building”ang nasunog.
Base sa inisyal nga imbestigasyon sa kabomberohan sa Medellin nga posibleng system overload (electrical) ang hinungdan sa maong sunog nga nagsugod sa lawak sa Grade 6. Miingon si Aballe nga dunay mga huhungihong sa mga saksi nga posibleng electric fan nga wala maibot ang hinungdan sa maong sunog. Midugang si Aballe nga iyang nahinabi ang adviser sa Grade 6 apan wala niya ibutyag ang pangalan niini ug hugot kini nga mihimakak nga duna silay nabiyaang nag-andar nga electric fan niadtong Biyernes.
Gibana-bana sa kabomberohan nga mokabat og kapin sa P2 milyones ang danyos sa sunog. Ang Barangay Daanlungsod upat ka kilometro ang gilay-on gikan sa munisipyo sa lungsod sa Medellin. – /EIM) (BANAT NEWS)