CEBU, Philippines - Wala’y kalapasan nga nahimo ang nipatuman sa demolisyon sa mga pinuy-anan kilid sa Mahiga Creek sa Subangdaku, dakbayan sa Mandaue niadtong Martes. Ang Commission on Human Rights-7 mismo ang namahayag nga wala’y kalapasan sa gihimo sa kapolisan ug kabomberohan tungod kay ang mga molupyo ang giingong unang nihimo og bayolente.
Nagubot ang demolisyon human ang mga residente nagdumili sa paghawa sa ilang lugar ug misangpot sa binatoay diin duha ang naangol.
Gumikan sa ilang gihimo ang kapolisan ug kabomberohan napugos pagpasirit og tubig ngadto sa mga residente.
Matud ni Primo Cadampog, chief investigator sa CHR-7, nga didto sila atol sa demolisyon ug nakita gyud nila nga gipatuman ang maximum tolerance sa mga tinugyanan sa balaud.
Gidugang ni Cadampog nga kadtong naangol giingong naunay sila pagkaigo sa bato nga gilabay sa ilang mga kauban ug dili tungod kay gibato sila sa kapolisan ug kabomberohan.
Andam hinuon modawat ang CHR-7 kun may reklamo sa ilang buhatan apan kinahanglan usab nga duna sila’y ebidensiya nga ipakita. (BANAT NEWS)