CEBU, Philippines – Patay na nga napalgan ang 29-anyos nga babaye kinsa giingong mabdos human naghikog sa barangay Triumfo, Carmen.
Ang nagpakamatay naila nga si Genelyn Lawas, nagpuyo sa maong lugar.
Sa imbestigayon sa Carmen Police nasayran nga nihangyo si Lawas sa iyang live-in partner nga dili molakaw apan nibiya gyud sa ilang balay ug miadto sa dakbayan sa Danao kay may importante nga gikuha.
Ulahi na nga nadiskubrehan sa iyang pag-umangkon nga singko anyos nga naghikog si Lawas gamit ang pisi nga gihigot sa iyang liog. Nasayran nga komplikado ang kahimtang sa puyo-puyo human gikatahong minyo ang iyang nakauban nga lalaki ug nagbulag sab sila sa iyang bana human nahibaw-an nga kini adunay laing lalaki nga gikalambigit.
Ang bana sa naghikog patay ang tua sa gawas sa nasud samtang ang asawa sa lalaki nga iyang kaipon ang tua sab sa gawas sa nasud.
Samtang sa dakbayan sa Sugbo, naghikog patay sab ang usa ka 32-anyos nga lalaki sa sitio Maomawan, barangay Babag niadtong Domingo sa gabii. Ang naghikog patay naila nga si Joel Baguio, minyo nga nagpuyo sa maong lugar.
Giingong makadaghan na misulay og hikog kaniadto si Baguio apan napugngan.
Apan niadtong Domingo sa gabii dihang nauli kini sa ilang balay nga hubog, nagkaaway kini ug iyang asawa nga si Anaclita hinungdan nga nigawas sa ilang balay kauban ang iyang mga anak.
Human sa pipila ka minutos, nakit-an na lang sa asawa nga nagbitay na si Baguio gamit ang pisi.
Problema sa salapi ang nakitang hinungdan sa paghikog ni Baguio. - /GMR) (BANAT NEWS)