CEBU, Philippines – Nagnegatibo ang 11 ka mga kawani sa kagamhanan sa siyudad sa Sugbo nga gipakalitan og drug test sa Cebu City Office for Substance Abuse Prevention (COSAP) kagahapon.
Upat ka kawani sa Department of Social Welfare and Services (DSWS), ang duha gikan sa Department of Engineering and Public Works (DEPW), usa gikan sa Cultural and Historical Affairs Commission (CHAC) ug upat sa Department of Public Services (DPS) ang gipaubos sa maong drug test.
Matud ni COSAP chief Alice Utlang, tungod sa resulta, epektibo gyud ang ilang kampanya batok sa paggamit sa ginadiling drugas.
“Naa na baya na-terminate sa ilang mga trabaho murag mahadlok na sad ang uban,” niingon si Utlang, apan wa niya isalikway nga posibleng duna lang gayuy wa masakpi.
Gipasalig ni Utlang nga dili gyud makahibalo ang mga opisyal nga i-test kun kinsa na ang sunod kay ila g’yud nga gipabiling sekreto ang schedule sa drug test.
Kahinumdoman nga sa sayong bahin karong buwana, nagnegatibo ‘sab ang 33 ka empleyado sa Cebu City Health Department nga nipailawom sa random drug test.
Matud ni Utlang nga nagpahigayon sila og seminar mahitungod sa ilegal nga drugas sa nagkalain-laing departamento sa kagamhanan sa syudad sa Sugbo.
Sa tuig 2000 napasar ang ordinansa nga nagkinahanglan sa mga empleyado sa siyudad nga mopailawom sa random drug testing. Gidasig sab niya ang mga nagpositibo sa ilegal nga drugas nga mopaubos sa libreng rehabilitation program sa siyudad. -/EIM) (BANAT NEWS)