CEBU, Philippines – Kapin 7 mil ang mitambong sa National Family Day nga gipahigayon sa Plaza Independencia sa dakbayan sa Sugbo niadtong adlaw nga Domingo.
Sila naggikan sa nagkadaiyang lugar sa Metro Cebu nga mga benepisyaryo sa 4P’s sa Department of Social Welfare and Development nga diin gisusi usab kung duna bay maayong gibunga sa estado sa ilang kinabuhi ang hinabang nga gihatag sa gobiyerno.
Ang pamilyang Albasin nga taga lungsod sa Dumanjug, nahimong 1st runner up sa gipahigayong Search for Model Family sa tanang benepisyaryo sa 4P’s sa Central Visayas.
Wa lang nagsalig ang pamilya sa gihatag nga binuwang tabang sa 4P’s nga cash assistance, apan gigamit nila kining puhonan aron mapatubo kini. Ang padre de pamilya nga si Jerry Albasin kinsa kaniadto usa ka konduktor sa bus tungod sa iyang paningkamot, nahimo na karon nga training supervisor.
Samtang mga honor students usab sa tunghaan ang ilang upat ka mga anak ug ang kamaguwangan mag-college na sa sunod tuig.
Matud ni DSWD Director Mercedita Jabagat nga aduna nay kapin sa dosentos mil nga benepisyaryo sa 4P’s ang Central Visayas, apan target nilang maserbisyuhan ang 2.3 milyones ka mga kabus nga pamilya sa tibuok nasud. -/EIM) (BANAT NEWS)