CEBU, Philippines – Usa ka lalaki ang gidakop sa mga manag-agaw ug gitabangan kini og kulata tungod sa pagduda nga siya maoy nangawat og manok diha sa Sitio Agad-Agad, Barangay Poblacion, Lungsod sa Cordova.
Giila ni Senior Police Officer One Llovero Agosto sa Cordova Police Station ang mga suspetsado nga managsuon nga sila si Andrew, 31, Dave, 27, ug Jude Biongcog, 28, apil na ang ilang ig-agaw nga si Anthony Biongcog Baguio, 22, pulos nagpuyo sa maong dapit.
Ang upat naaktohan sa ilang silingang si Police Officer One Lezyl Escabas nga sakop sa Public Safety Battalion dihang ilang gikulata si Jonathan Deguillo,19, nga nagpuyo usab sa maong dapit.
Matud pa ni Agosto, ang biktima mitug-an nga nagkaon siya sa panimalay sa iyang iyaan dihang pugsanon siyang gibunlot sa mga suspek ug gidala ngadto sa ilang balay ug didto gipugos siya pagpatug-an nga siya maoy nangawat sa manok.
Ang biktima mihimakak sa gipasangil sa mga suspetsado hinungdan nga gitabangan kini og kulata nga nakaingon sa grabeng bun-og sa lawas nga naangkon niini.
Si Escabas nga silingan lang sa mga suspek ug biktima nakamatikod sa maong pagpangulata ug midakop sa upat. Ang biktima dali nga gihatod sa Vicente Sotto Memorial Medical Center sa dakbayan sa Sugbo. -/EIM) (BANAT NEWS)