CEBU, Philippines - Ang kapulisan sa siyudad sa Talisay mipagawas na sa cartographic sketch sa usa sa mga suspek sa nahitabong tulis sa Avon Tabunok Branch niadtong milabay’ng semana.
Una niini, nasikop sa kapulisan ang giingong lookout sa maong krimen nga si Sisinio Merced. Ang Talisay City Police mipagawas sa cartographic sketch sa laing tulisan nga gihulagway nga usa ka batan-on.
Si Superintendent Reycel Carmelo Dayon mibutyag nga wala pa silay nakuhang impormasyon kun si kinsa g’yud ang maong tawo ilabi na nga ang nasikop nga si Merced wala man moangkon sa krimen.
Hugot usab nga gihimakak ni Dayon nga “fall guy” ang ilang nasikop sanglit ang ilang gibasehan mao man ang pamahayag sa saksi nga positibong miila kang Merced. Karong adlawa ipasaka sa kapulisan ang kasong robbery with murder batok sa suspek nga si Merced. (BANAT NEWS)