CEBU, Philippines – Nakaangkon og grabeng bun-og sa kalawasan ang usa ka field training police (FTP) human aksidente’ng nabangga ang gisakyan nga motorsiklo sa gutter sa karsada alas 4 sa kadlawon kagahapon sa dakbayan sa Carcar.
Giila ang maong polis nga si Dennis Gregory Noel, 25, ulitawo, nga nadestino sa Guadalupe Police Station sa dakbayan sa Sugbo ug lumad nga taga Carcar.
Matud ni PO2 Madison Cinco sa Carcar Police Station nga paingon na unta nga mopauli ang biktima gikan sa trabaho sa dihang naaksidente.
Sumala pa ni Cinco nga kurbadahon ang karsada sa maong lugar nga pipila lang ka metros ang gilay-on gikan sa ilang buhatan ug gituohan nga nakatulog ang maong polis.
Dugang pa ni Cinco nga human nga napasok sa gutter kilid sa karsada ang motorsiklo ni Noel, maayong pagkalagpot ang polis sa usa ka lupa nga bahin sa maong lugar nga gibanabana nga duna’y gilawmon nga lapas sa tawo ug nabunal.
Sa pagkutlo ning balita wala pa’y nakuha nga bag-ong impormasyon sa kahimtang sa maong polis apan gihulagway nga nakaangkon kini og seryosong bun-og sa kalawasan nga dali usab nga gidala sa Carcar District Hospital. -/GMR) (BANAT NEWS)