CEBU, Philippines – Pormal nang milingkod sa iyang katungdanan ang bag-ong hepe sa kapulisan sa dakbayan sa Toledo kagahapong adlawa atol sa gipahigayong turn-over ceremony.
Si Chief Inspector Ricky Delilis ang bag-ong hepe sa Toledo City Police Station isip hulip ni Police Chief Inspector Michael Anthony Bastes nga ibalik una sa Cebu Provincial Police Office (CPPO).
Si Delilis maoy chief operation sa Cebu Provincial Police Office ug kanhi hepe sa kapulisan sa Danao City ug Carcar City.
Dugang sa bag-ong hepe nga iyang ipadayon ang gisugdan na nga kampanya ug programa ni Bastes sa siyudad partikular na ang pagsumpo sa ilegal nga druga ug pagpanakop sa mga wanted person.
Mitambong sa gipahigayong turnover ceremony si Toledo City Mayor John Henry Sonny Osmeña ug ubang opisyal sa siyudad. Si Osmeña maoy personal nga mipili kang Delilis hulip kang Bastes. Nipadayag usab ang mayor sa pagpasalamat kang Bastes sa natampo niini sa pagpatunhay sa dakbayan.
Si Senior Superintendent Noel Gillamac, director sa CPPO miingon nga sa miaging buwan pa siya nakadawat og request ni Bastes nga magpabalhin kini og destino sa headquarters aron mapaduol sa iyang pamilya. - /EIM (BANAT NEWS)