CEBU, Philippines - Tungod sa doble ug subsob nga kampanya batok sa sakit nga dengue, gawas na karon ang dakbayan sa Toledo sa listahan sa may taas nga kaso sa maong sakit.
Gihangop sa pangulo sa City Health Department, Dr. Tiburcio Dacalos, ang maong resulta.
Matud ni Dacalos nga sa nakalabay nga katuigan, permanenteng sulod sa top 10 ang Toledo nga adunay taas nga kaso sa dengue.
Gani ika-unom ang Toledo sa sa nakalabay’ng tuig nga adunay daghang kaso.
Bisan sa maong kalamboan, dili gihapon angayang mokompiyansa ang katawhan batok sa dengue ilabi na nga panahon karon sa ting-uwan, matud sa opisyal.
Giawhag ni Dacalos ang katawhan nga padayong manglimpiyo sa palibot, pagguba sa mga lugar nga pwedeng kapuy-an ug kaitlogan sa mga lamok nga nagdala og dengue.
Nanghinaut si Dacalos nga magmatngon ang taga Toledo sa kanunay nga pagpanglimpyo aron sa hingpit nga masumpo ang makamatay nga sakit nga dengue sa siyudad. (BANAT NEWS)