CEBU, Philippines - Bisan nilapos ang bala sa ulo, nakasukol pa ang biktima sa pagpamusil sa sitio Lahinglahing, Mabolo, dakbayan sa Sugbo niadtong Martes sa gabii.
Ang biktima naila nga si Jesse Apatan, 21, construction worker, samtang ang suspek nailhan nga si Rosbert Lasotan, parehong taga La Libertad, Negros Oriental ug kasamtangan nagpuyo sa Mabolo.
Matud ni PO1 John Erick Samosa sa Homicide Section sa Cebu City Police Office (CCPO) nga samtang naglingkod ang biktima sa tindahan duol sa iyang gipuy-an, kalit lang miabot ang suspek nga hubog ug dayon pusil tumong sa ulo sa biktima.
Sumala pa nga milapos ang bala sa pikas kilid sa ulo ni Apatan apan nakahigayon pa kini og ilog sa armas sa suspek.
Wala makabantay ang biktima nga aduna’y kuyog ang suspek kinsa misukmag sa biktima ug mipusil pa gyud sa iyang lawas hinungdan sa iyang pagkahagba.
Daling misibat ang duha ka suspek sakay sa taxi samtang ang mga nakakita sa hitabo mao’y midala sa biktima sa Cebu City Medical Center (CCMC).
Sa imbestigasyon sa kapolisan nakatug-an pa ang biktima nga nakabikil niya ang anak ni Lasotan pipila ka semana na ang nakalabay gumikan sa duwa nga basketball.
Padayon pa’ng gipangita sa kapolisan ang suspek samtang ang biktima anaa sa talandugon nga kahimtang sa tambalanan. (BANAT NEWS)