CEBU, Philippines- Wala’y trabaho ang mga pribado ug publikong buhatan ug wala’y klase sa tanang tunghaan sa dakbayan sa Mandaue sa Agosto 29.
Kini human gideklarar ni Presidente Benigno Simeon Aquino III nga holiday ang maong adlaw nunot sa ika-45 nga Charter Day Anniversary nga himoon sa Agosto 30 sa matag tuig.
Gumikan kay adlaw man nga Sabado mao’y hinungdan nga ang Agosto 29 nga nahimutang sa adlaw nga Biyernes ang gihimong holiday aron makatambong ang publiko ug mga tinun-an sa kalihukan.
Kagahapon nga usa usab ka holiday lukop nasud gibuksan ang Interactive Science Museum ug Charter Day Exhibit sa Parkmall.
Si Louella Cabañero, City Tourism Officer, miingon nga ang Charter Day Exhibit maoy pagpasundayag sa nagkadaiyang hulagway sa mahinungdanong talan-awon sa dakbayan sukad pa kaniadto sa panahon sa mga karaan ug hangtud karong panahona.
Naglakip na niini ang hulagway sa karaang simbahan sa St. Joseph Shrine, ang karaang mga dalan sa dakbayan ug ingon man ang mga bag-ong talan-awon nga naglakip sa Marcelo Fernan Bridge ug uban pa. Sa Agosto 28 himoon ang Bibingkahan ug Masareal Festival nga salmutan sa mga tinun-an sa nagkadaiyang tunghaan sa dakbayan nga ubos usab sa pagdumala sa Department of Education (DepEd) Mandaue City Division.
Si Cabañero nga nahinabi sa Banat News miingon nga atol sa maong adlaw himoon sa mga tinun-an ang indigay sa pagluto og bibingka ug masareal sa Parkmall ug masaksihan sa publiko. - /GMR) (BANAT NEWS)