CEBU, Philippines - Giandam na ang kaso batok sa kanhi polis nga nasikop sa Provincial Intelligence Branch (PIB) Lamac, Consolacion nga nasakmitan og kapin P300 mil nga kantidad sa drugas.
Gipahibawo sa hepe sa PIB, Supt. Rodulfo Albutra, nga ila pa’ng gisubay kon wala ba’y koneksyon si kanhi PO3 Antonio Aguisanda sa mga polis nga aktibo pa sa serbisyo.
Duda ni Albutra nga si Aguisanda gihimong lider sa grupo gumikan sa iyang pagka-kanhi polis. Sa pagpakighinabi sa Banat News kang Aguisanda, kini milimod sa pasangil batok kaniya.
Hinuon iyang giangkon nga mag-gamitan siya og drugas apan wala mamaligya.
Iya usab gilimod ang pasangil bahin sa carnapping.
Apan gihangop ni Aguisanda ang nahitabo aron iyang mapamatud-an sa korte nga dili siya guilty sa mga pasangil sa kapolisan.
Lakip sa posibleng atubangon niya nga mga kaso ang carnapping, pagbaligya og ilegal nga drugas ug pagpanulis. (BANAT NEWS)