CEBU, Philippines- Gitulis sa tulo ka armadong lalaki ang Rose Pharmacy Branch sa Barangay Pitogo, Consolacion alas dos pasado kaniadto’ng Lunes sa hapon ug nakuhaan kini og kapin sa P80 mil nga salapi.
Apan ang kapolisan abtik nga midakop dayon sa usa sa tulo ka tulisan human nga siya namay-ongan sa mga nakasaksi sa mao nga tulis ug misumbong ngadto sa mga polis.
Si PO3 Glenn Burlas miila sa nadakpan nga mao si Rodulfo Caparoso Jr. hingkod ang panuigon ug taga Sitio Kawayanan, Barangay Yati, Liloan kinsa giila g’yud sa mga kawani sa botika nga kabahin sa mitulis kanila.
Si Caparoso giingon nga nakuhaan og .357 Magnum revolver atol sa iyang pagkasikop.
Matud pa ni PO3 Burlas nga nailhan na usab nila ang laing duha pa ka tulisan apan gipugngan lang usa nila ang mga ngalan tungod kay nagpadayon pa ang ilang follow-up operation.
Si PO3 Burlas miingon nga pagkadawat nila sa alarma sa tulis dali sila nga mihimo og pakisusi ug ang mga estambay sa maong dapit nga nakakita sa pagsibat maoy mitug-an kanila nga namay-ongan nila ang mga mitulis sa botika ug kon diin kini mipaingon human sa tulis. Ang hepe sa Consolacion Police Station nga si Senior Inspector Franco Rodulph Oriol nangulo sa iyang mga sakop paghimo’g follow-up operation ug ilang giadto ang balay ni Caparoso sa Yati, Liloan.
Si PO3 Arthur Ariate, imbestigador sa Consolacion Police Station, misaysay nga ang mga tulisan nga nagsakay og motorsiklo ug wala mag-helmet miabot didto sa atubangan sa botika.
Ang duha sa mga tulisan misulod sa botika nga walay guwardiya ug ang duty pharmacist nga si Carlos Alburo ilang gitiona’g armas ug gihulga nga pamusilon kon dili ihatag ang kuwarta.
Ang kahera sa maong botika nga si Anna Jugilon maoy gimandoan sa tulisan sa pag-abli sa kaha ug gipanguha ang P80 mil nga halin ug pagkahuman mimando kanila pagsulod sa ilang bodega.
Dugang pa ni PO3 Ariate nga sa paglabay sa 10 minutos nabati sa mga biktima ug sa mga kustomer gikan sa bodega ang pagsampit sa misulod nga laing kustomer ug maoy nakaaghat kanila nga mogawas kay wala na ang mga tulisan.
Naproblema ang mga imbestigador kay ang CCTV Camera sa botika wala na motrabaho. (Decemay P. Padilla, Romeo Limpangog and Jojo Ugdol/RUB) (BANAT NEWS)