CEBU, Philippines - Gisikop ang unom ka tawo human naaktohan nga nagpayuhot og ilegal nga drugas samtang nagpahigayon ang kapolisan og Intensified Police Operation sa managlahing lugar sa dakbayan sa Sugbo.
Nadakpan sa barangay Kamagayan sila si Richard Milar Abellar, 26; Mario Rosales Baguio, 39; Jesselito Avila Cruz, 41 ug Vivian Cortes Velarde, 36, nga nagpuyo sa Upper Laguerta, Lahug.
Tungod sa gipahigayon nga Intensified Police Operation sa maong dapit naaktohan ang upat nga naggamit kini og ilegal nga drugas. Nasakmit sa kapolisan ang upat ka disposable syringe nga adunay sulod nga liquid substance sa Nubain, duha ka wa’y sulod nga ampoules sa Nubain. Daling gisikop ug gidala ang upat sa Pari-an Police Station. Samtang nasikop sa barangay Lorega-San Miguel si Rolando Gastador Linabog, 42, taga Sitio Cañares sa maong barangay.
Nakuha sa posesyon ni Linabog ang usa ka improvised nga linukot nga papel sa sigarilyo ug gagmay’ng lugas sa dahon sa marijuana nga giputos og gamay nga papel sa newspaper.
Wala usab makaipsot sa barangay T. Padilla si Gil Cabahug Cabual, 24, nagpuyo sa Sitio Freedom.
Narekober sa kapolisan gikan ni Cabual ang usa ka gamay nga pakete sa gituohang shabu.( /GMR)(BANAT NEWS)