CEBU, Philippines - Nag-viral na sa mga social networking sites ang mga hulagway sa 16-anyos nga dalagita nga giingong nangawat og mga sinina sa usa ka boutique sud sa usa ka mall nga nagkantidad og dul-an P10 mil.
Nakasinati na og “cyber bullying” ang menor de edad ug gihulagway sa usa ka behavioral expert nga dili kini makatabang ug makaapektar hinuon sa iyang pagkatawo.
Nanawagan sa publiko si Dr. Renato Obra, usa ka psychiatrist ug pangulo sa Vicente Sotto Memorial Medical Center for Behavioral Science, nga hunongon ang pagbiay-biay sa bata ug dili kini dayon hukman sa iyang nahimo.
Usa ka opisyal sa lalawigan sa Southern Leyte nanawagan sa mga tigbalita dinhi sa Sugbo nga hunongon na ang pagpakita sa nawong ug pagbutyag sa pangan sa dalagita tungod kay menor pa kini.
Gani ang maong opisyal mipadala’g kopya sa birth certificate sa menor de edad aron pagmatuod nga nagpangidaron pa kini’g 16- anyos.
Dunay pipila ka mga netizens ang “below the belt” na ang pagbiay-biay sa menor. Si Obra miingon nga kung basehan ang mga report nga iyang nabasa bahin sa maong bata, matawag kini nga disorder nga “kleptomaniac” o “impulse control problem.”
Usa kini ka sakit diin ang usa ka tawo dili maka-kontrol sa kaugalingon nga di makuha ang gusto niya nga butang, apan giklaro ni Obra nga matambalan kini pinaagi pagpahigayon og counselling ug medisina.
Nahimong kontrobersyal ang maong dalagita human kini gireklamo sa usa ka disco bar nga wa mobayad ug sa pagpanguha niini og mahalong bisti.
Gani giimbestigar ang kapolisan sa Subangdako police station nga giingong wa mo-blotter sa insidente ug nagpa-selfie kauban sa maong batan-on. (BANAT NEWS)