CEBU, Philippines- Wala magpatim-aw ang magtiayong lider sa Communist Party of the Philippines-New People’s Army (CPP-NPA), Benito ug Wilma Tiamzon, sa korte dakbayan sa Toledo ug lima niini ka kauban.
Kini human sila niduso og motion to defer arraignment pinaagi sa ilang abogado nga si Atty. Rachel Pastores tungod sa ilang pending motion for reconsideration nga wala pa maresolba.
Sila si Benito ug Wilma Tiamzon, Nona “Lorraine” Castillo, Jeosi Nepa, Joel Enano, Arlene Panea ug Rex Villaflor nag-atubang og kasong kalapasan sa Comprehensive Firearms and Ammunition Regulation Act ug illegal possession of explosives.
Matud ni Pastores nga dihang gidakop ang iyang kliyente wala kini mga armas ug explosives nga dala ug giingong planted ang ebidensiya nga nakuha sa kapolisan.
Tungod sa motion for reconsideration, gihatagan ni Judge Ruben Altubar og 15 ka adlaw ang prosekusiyon sa pagduso sa ilang tubag ug lima ka adlaw usab kining tubagon sa depensa.
Human niana, matud ni Altubar nga resolbahon na ang motion for reconsideration.
Ang magtiayon ug ang mga kauban nadakpan niadtong Marso 22, 2014 sa mga sakop sa mga sundawo ug kapolisan sa utlanan sa lungsod sa San Fernando ug Aloguinsan duol na sa utlanan sa dakbayan sa Carcar.
Kagahapon adunay mga raliyista gawas sa korte nga nanawagan nga pagawasn ang magtiayong Tiamzon ug kaubanan. - /GMR) (BANAT NEWS)