CEBU, Philippines - Nitambag si acting Cebu City Mayor Edgardo Labella sa publiko nga dili angay mabalaka sa pagkunhod sa status sa Cebu City Medical Center.
Kini gumikan kay padayun pang gitukod ang bag-ong CCMC hulip sa karaan nga naguba sa niaging linog.
Si Labella miklaro nga ang bed capacity sa hospital dili ang hinungdan nga mi-ubos ang status sa CCMC kun dili ang kapasidad sa paghatag og “intensive medical care”.
Segun ni Labella nga ang CCMC isip Level 1 hospital adunay laboratory, operating room, x-ray ug delivery room.
Samtang ang Level 2 medical facility adunay nagkalain-laing departamento sama sa pediatrics, internal medicine, surgery, obstetrician ug genecology ug Level 3 mao ang “more advanced facility with all the basic departments and sub-departments”.
Sumala ni Labella ang mga pasyente nga dunay “serious surgical cases” ang ilang i-refer sa laing pribado ug pangpublikong tambalanan.
Ang Vicente Sotto Memorial Medical Center mipasalig sa kagamhanan sa dakbayan sa Sugbo nga andam sila modawat sa mga pasyente sa CCMC.
Si Labella malaumon nga mabalik na sa di madugay ang Level 2 status sa CCMC. (BANAT NEWS)