CEBU, Philippines - Supak ang Pilipinas Water Resources Incorporated nga magbuhat ang SM Prime Holdings Corporation og kaugalingon niining Waste Water Treatment Plant sa napalit niining yuta sa South Road Properties o SRP.
Ubos sa Joint Venture Agreement (JVA) taliwa sa dakbayan ug PWRI nga pinirmahan niadtong Mayo 28, 2010 nga ang PWRI ang modumala sa tanang waste water sa tibuok dakbayan.
Si Engr. Ruben Villamor, General Manager sa PWRI nipadala og duha ka pahinang suwat ni Cebu City Mayor Michael Rama nga nagpahinumdom nga ang gibuhat nga lakang sa SM kalapasan sa maong JVA.
Kahinumdoman nga ang PWRI ug kagamhanan sa dakbayan nagkasinabot nga magbahin sa kita sa matag cubic meters nga maproseso sa PWRI.
Matud pa sa suwat nga makabahin ang dakbayan og singko pesos kada cubic meter kung ang Waste Water Treatment Plant nga gipanag-iya niini ang gamiton.
Sumala pa nga P2.50 ang mabahin sa PWRI sa matag cubic meter kung samang WWTP ang gamiton. Ang makuhang bahin sa PWRI mapunta sa ilang dugang nga planta.
Matud ni Villamor nga kung tugotan ang SM nga mobuhat og kaugalingong planta makaagni kini sa ubang mga kompanya nga magbuhat sad og kaugalingon niining planta.
Kung mahitabo kini wa nay bili ang planta sa PWRI. - /EIM) (BANAT NEWS)