CEBU, Philippines- Kusganon na nga nanawagan ang Department of Environment and Natural Resources-7 nilang Gob. Hilario Davide III ug Naga City Mayor Valdemar Chiong nga dalion ang pagputol sa pito ka mga karaan ug guwang na kaayong mga kahoy daplin sa karsada nga naghatag og kakuyaw sa mga motorista.
Si DENR-7 Regional Executive Director Isabelo R. Montejo pormal nga nipadala og suwat hangyo ngadto kang Davide ug Chiong lakip na sa buhatan sa Department of Public Works and Highways-7. Kini human namatud-an sa "tree health monitoring and assessment on the defective or diseased roadside trees" nga lata na ang punoan sa karaang mga kahoy. Gihangyo usab ni Montejo ang gobernador lakip na ang DPWH-7, Land Transportation Office-7 ug Visayan Electric Company (VECO) nga tabangan ang kagamhanan sa siyudad sa Naga sa pagputol sa naasoy’ng mga kahoy. - /GMR) (BANAT NEWS)