CEBU, Philippines - Midangop sa Mambaling Police Station ang usa ka 87-anyos nga biyuda’ng babaye human kini gisaka sa iyang panimalay ug gitulis sa iyaha ra ‘sab nga gikuhang pintor diha sa Ganciang Street, Barangay Mambaling ning dakbayan.
Pasado ala-una sa nakalabay nga kadlawon, samtang nahinanok sa pagkatulog ang biktima nga si Rosario Conception kalit lang kini nga nakamata dihang gibuak ang bintana sa iyang kwarto.
Ang suspek nga iyaha dayong nailhan nga si Arnel Servano, alyas “Baludoy” nga taga Barangay Duljo-Fatima kalit nga mituok ug mipasirit kaniya og insect repellant.
Matud pa ni PO3 Diosdado Andales sa Mambaling Police Station nga nahinabi sa Banat News nga nawad-an sa iyang panimuot ang biktima.
Nakuha sa suspek ang P18 mil nga cash ug usa ka Seiko nga relo nga nagkantidad $1,000.
Wa na maabti sa kapolisan ang suspek diha sa iyang balay. (BANAT NEWS)