CEBU, Philippines - Kritikal ang usa ka drayber sa motorsiklo human nadisgrasya sa iyang gimanehong motorsiklo tungod sa iro nga kalit nilabang sa karsada sa Poblacion, Alcantara niadtong Martes sa gabii.
Giila ang biktima nga si Ruben Dinagatan, 32, taga lungsod sa Badian.
Matud ni PO1 Glenn Buena sa Alcantara Police Station nga nahinabi sa Banat News nga nalagpot si Dinagatan sa iyang gimanehong motorsiklo nga Honda Wave 100 cc nga adunay plate number nga 6623 YY.
Base sa imbestigasyon, gikan si Dinagatan sa lungsod sa Ronda ug padulong na unta kining balik sa Badian.
Paghiabot sa kurbadang bahin sa may simbahan sa lungsod sa Alcantara, kalit lang milabang ang usa ka iro ug nadasmagan.
Nawad-an og kontrol ang drayber nga miresulta sa iyang pagkalagpot.
Sa pakisusi sa kapolisan, wala’y dalang driver’s license ang biktima atol sa insidente.
Ang biktima nakaangkon og pipila ka mga samad sa nagkalain-laing parte sa iyang lawas ug daling gidala sa Badian District Hospital.
Kasamtangang gikustodiya sa kapolisan ang motorsiklo. (BANAT NEWS)