CEBU, Philippines- Mokabat sa 2,500 ka mga punoan sa marijuana nga mahimo nang anihon ang gilarot sa kapulisan sa Balamban sa Sitio Taro, Barangay Bayong sa maong lungsod niadtong Biyernes sa gabii.
Matud pa ni Chief Inspector Richard Oliver ang hepe sa Balamban Police Station nga nahinabi sa Banat News nga duna’y nakatug-an nila nga aduna’y daghang marijuana nga gitanom sa maong lugar.
Sumala pa ni Oliver nga duha ka oras ang biyahe sa sakyanan ug moabot sab sa kapin duha ka oras ang ilang gilakaw padung sa maong plantasyon.
Pasado alas-10 na sa gabii miabot ang kapulisan sa Sitio Taro ug didto ilang nakita ang lapas tawo na nga mga marijuana nga giipon sa pagtanom kauban sa mga mais.
Walay nasikop nga tawo ang kapulisan apan nagtuo silang ang mitanom sa mais maoy nagtanom sa marijuana.
Ang maong yuta gipanag-iya sa gobiyerno ug si bisan kinsa lang ang nag-ugmad niini.
Gibanabana sa opisyal nga lapas P200 mil ang abuton sa maong marijuana kun mabaligya sa mga pushers. - /EIM) (BANAT NEWS)