CEBU, Philippines - Gitinguha ni Konsehal Elstone Dabon nga ang Public Employment Service Office (PESO) sa dakbayan sa Mandaue malakip na sa kabutangan og gahin nga salapi matag tuig.
Si Dabon miduso og ordinansahon nga hingpit na nga nag-ila sa PESO isip usa na ka departamento sa kagamhanan sa dakbayan.
Nunot niini ang mangulo sa PESO ilhon na usab nga department head ug mahimo na kining kahatagan sa iyang kaugalingong gahin sa matag tuig.
Matud pa ni Dabon nga sa kasamtangan ang PESO dili makalihok og iya kung may programa nga ipatuman sanglit mangayo pa og gahin sa konseho ug aprobahan sa mayor.
Naglakip sa mga kalihukan sa PESO ang pagpahigayon og nagkadaiyang job fair ug lakip na ang pagpasiugda og seminar sa paghatag og mga giya sa mga aplikante sa ilang pag-apply og trabaho. (BANAT NEWS)