Tulo ka intel gibalhin sa traffic

CEBU, Philippines - Gibalhin sa traffic division ang tulo ka intelligence personnel sa Talisay City Police Station.

Si Supt. Reycel Carmelo Dayon, hepe sa kapolisan sa dakbayan sa Talisay, mibutyag sa mga tigbalita nga ang tulo ka sakop sa intelligence wala’y nahatag nga accomplishment report kabahin sa ginadiling drugas. Matud ni Dayon nga unom ka bag-ong polis, duha sa investigation ug ang upat sa Special Weapon and Tactics (SWAT), maoy gihulip sa tulo.

Giangkon ni Dayon nga nataligam-an niya ang problema sa drugas tungod kay ang mga kaso sa robbery ug pagpangawat ang iyang gi-focus sa pag-atiman.

Pasabot ni Dayon nga misalig siya sa iyang mga daan na nga intelligence personnel ug nagdahum siya nga mahatagan og accomplishment report.

Matud ni Dayon nga sulod sa tulo ka buwan nga paglingkod niya isip hepe sa TCPS, 15 na ka tawo ang ilang nasikop may kalambigitan sa ilegal nga drugas.

Kagahapon si Dayon nagkanayon nga bisan og lisud ang kampanya batok sa ginadiling drugas apan paningkamutan niyang matuman ang mando sa hepe sa kapolisan sa probinsiya nga makadakop og daku nga drug personality. – /GMR (BANAT NEWS)