CEBU, Philippines - Gipalig-on sa mga tinugyanan City Health Department sa dakbayan sa Toledo ang ilang kampanya batok sa makamatay nga sakit nga tuberculosis.
Matud ni Dr. Tiburcio Dacalos, hepe sa CHD, nga ila pang gipalapdan ang ilang kampanya batok sa maong sakit.
Gani gipailawom sa usa ka seminar sa Department of Health-7 ang mga barangay nutrition scholars (BNS) sa Toledo kalabot sa TB.
Gibutyag ni Dacalos nga dili taas o daghan ang ihap sa maong makamatay nga sakit nga natala sa dakbayan apan dili angayang mokumpiyansa.
Gipasalig ni Dacalos nga aduna’y igong tambal ang CHD batok TB nga ikahatag sa mga pasyente.
Nasayran nga ang sakit nga TB maoy ikaduha nga taas og mortality rate kon ihap sa mga nakalas sa maong sakit. Dali usab kini nga mokatap ug makatakboy sa ubang tawo hinungdan nga dili angayang mokompiyansa ug angayang magbaton og regular check-up ug pagpanglimpyo sa panglawas. (BANAT NEWS)