CEBU, Philippines - Gitug-an sa Department of Health-7 nga nikunhod ang gidaghanon sa kaso sa dengue sa Central Visayas gikan sa bulan sa Enero hangtud sa bulan sa Hunyo ning tuiga itandi sa niaging tuig.
Si Dr. Rennan Cimafranca, hepe sa Regional Epidemiology and Surveillance Unit-7, nitug-an nga niining tuiga nikabat lang og 1,517 ka kaso sa dengue ug unom ang patay nga mas ubos kaysa niaging tuig nga may 7,522 ka kaso ug 24 usab ang namatay sa samang mga buwan.
Sigon sa ilang record, sagad sa mga pasyente nga nalandig sa tambalanan tungod sa dengue nagpangedaron og 17-anyos. Ang labing bata nga nataptan sa maong sakit nagpangedaron og usa ka bulan nga bata ug ang labing tiguwang nagpangedaron og 87-anyos.
Gipasabot hinoon ni Cimafranca nga base sa ilang mga records, nagpakita nga kun mosulbong ang kaso sa dengue sa usa ka tuig, minus ang sunod tuig.
Apan bisan pa sa maong kalambuan, si Cimafranca niingon nga padayon gihapon ang ilang kampanya batok sa dengue ilabina sa paghingusog sa 4:00 o'clock habit sa paglimpyo sa palibot sa balay aron dili makasanay ang mga lamok nga nagdala sa sakit nga dengue. (BANAT NEWS)