CEBU, Philippines - Milyones ang kantidad sa mga kabhang sa budyong ang nasakmit sa mga sakop sa Provincial Anti-Illegal Fishing Task Force sa gihimong random inspection sa lungsod sa Minglanilla sa niaging adlaw.
Matud sa pangulo sa task force, Anthony Loy Madrigal nga ang usa ka kabhang sa budyong mobalor og singko mil dolyares ang usa didto sa gawas sa nasud base sa ilang pakisusi sa internet.
Nunot niini sumala ni Madrigal nga milyones gyud ang balor sa kinarton nga kabhang sa budyong nga ilang nasakmit kung ibaligya na kini sa gawas sa nasud.
Giingong gikan sa Zamboanga ang maong kargamento ug gikarga sa trak nga gimaneho sa usa ka Ronnel Lumapas kinsa miingon nga gisugo ra sila sa pagpahatud niini sa Sugbo. Nagtoo si Lumapas nga buwad ang sulod sa mga kahon hinungdan sa iyang kakurat nga mga kabhang sa mahalong kinhason ang ilang nakita sa dihang gihimo ang inspeksiyon sa task force.
Multa nga P120 mil ang ipahamtang sa matumbok nga responsable sa pagpalusot sa kargamento samtang pasakaan usab sa tukmang kaso. (BANAT NEWS)