Digital tourism project subhan sa Carcar

CEBU, Philippines - Ang siyudad sa Carcar molusad unya sa ilang digital tourism project atol sa ilang ika-7 nga kasaulogan sa Charter Day karong Hulyo 7 ning tuiga.

Ang Public Information Officer sa Carcar nga si Candice Acuna nagkanayon nga ang maong proyekto maghatag og kamahinungdanon ug kamabulukon sa ilang Charter Day celebration tungod kay sila man ang ikatulong local government units dinhi sa probinsiya sa Sugbo nga nipatuman og digital tourism.

Iyang gipasabot nga ang digital tourism project sa siyudad pagalangkoban sa e-book, digital map and guides sa mobile ug internet application sa siyudad.

Si Max Limpag sa Innopub Media nga mao usab ang partner sa siyudad sa Carcar sa naasoy nga proyekto nagkanayon , nga ang digital tourism migamit na sa mobile technology alang sa paghatud sa "tourism, cultural and historical information" sanglit nagkadaghan na man ang gidaghanon sa mga konsumidor, mga travelers ug mga turista nga nagsalig sa ilang mobile.

Iya usab nga gipahibawo nga dinhi sa probinsiya sa Sugbo ang mga LGU's nga nisagop sa digital tourism mao ang lungsod sa Argao ug ang lungsod sa Boljoon. (BANAT NEWS)

Show comments