CEBU, Philippines - Kritikal ang kondisyon sa usa ka player sa basketball human kini gipusil pagkahuman sa ilang duwa sud sa usa ka tunghaan sa Sitio Kagudoy, Barangay Basak dakbayan sa Lapu-Lapu sa milabay’ng hapon.
Ang napusilan mao si Eugene Ancog Abing, 29, residente sa Bagumbayan, Barangay Maribago sa dakbayan sa Lapu-Lapu.
Sa pasiunang imbestigasyon ni SPO1 Allan Pantaleon nasuta nga atol sa ilang duwa nga basketball sud sa Indiana Aerospace University ang team ni Abing ug ang kaatbang niining team nila ni Rey Lester Dulzora Igot, 21, residente sa Sitio Kauswagan, Barangay Bankal sa dakbayan sa Lapu-Lapu nagkagubot apan nahusay ra sa guwardiya sa maong tunghaan.
Human sa ilang duwa paggawas sa team ni Abing sa gate sa maong tunghaan mitumaw na usab ang laing kagubot ug misantop sa panagrambol sa duha ka team. Tunga-tunga sa lamok-lamok mibunot og armas si Igot ug dayong pamusil sa kaatbang nga grupo ug maoy naigo si Abing luyo nga bahin sa hawak hinungdan nga kini gidala sa tambalanan. Samtang si Igot mitahan sa kapolisan aron tubagon ang nahimo niining kasal-anan. (BANAT NEWS)