CEBU, Philippines - Gikatakdang i-demolis sa Department of Education ang 18 ka lawak saringan sa Subangdaku Technical Vocational School sa dakbayan sa Mandaue aron matukod ang bag-ong building sa nahimutangan niini.
Kini ang nasayran kang Engr. Cielo Jamora, property costudian sa DepEd Mandaue City Division, kinsa miingon nga ang maong mga lawak saringan ang nakasinati og dakong kadaut sa 7.2 magnitude nga linog ug bagyong Yolanda sa miaging tuig. Matud ni Jamora nga ang pagpatukod og bag-ong building sa maong tulunghaan mao gyud ang labing mahinungdanon.
Gibutyag ni Jamora nga daghang pangpublikong tunghaan sa kabarangayan ang nakasinati og kakuwang sa ilang mga lawak saringan sa pagbukas sa klase.
Kasamtangang gihimo sa ilang mga principal ang pag-shifting sa klase sa mga tinun-an sa high school ug elementary diin adunay magklase sa buntag ug lain ang magklase sa hapon. Adunay 23 ka lawak saringan sa mga nagkadaiyang publikong tunghaan sa dakbayan nga gideklarar sa mga engineer sa dakbayan ug DepEd nga dili na magamit human sa linog ug bagyong Yolanda.
Nahuman na pag-ayo ang uban apan dili pa magamit tungod kay wala pa’y clearance ang City Engineer. (BANAT NEWS)